26/12/2023
Unha central de subministro de enerxía térmica en Lugo premiada polo sector
A construción por Misturas dunha planta de biomasa e a súa rede de distribución de enerxía térmica para calefacción, destinada a unha área de catro centros educativos e dúas residencias xuvenís en Lugo, ten recibido o recoñecemento expreso do Clúster de Enerxías Renovables de Galicia (Cluergal), no marco do segundo simposio Urban Solutions.
A actuación, unha importante aposta ecolóxica da Consellería de Cultura, Educación, Formación Profesional e Universidades en colaboración co Instituto Enerxético de Galicia (INEGA), supuxo a instalación de dúas caldeiras cunha potencia nominal cada unha de 800 kW e unha temperatura de funcionamento máxima de 95ºC. A Xunta de Galicia estima que coa instalación aforraranse ao ano máis de 500 toneladas de emisións de CO2.
O proxecto beneficia ao I.E.S. Lucus Augusti, I.E.S. Nosa Señora dos Ollos Grandes, C.I.F.P. Politécnico e C.E.I.P. Anexa, que comparte inmoble coa Facultade de Formación do Profesorado, así como ás residencias da Consellería de Política Social Lugo I e Lugo II.
