29/08/2022
Reaberto ao paseo o Peirao de Maura de Santander, tra-la rehabilitación acometida por Misturas
A finais do pasado mes de xullo foi reaberto ao público o paseo marítimo de Santander no tramo que discorre sobre o Peirao de Maura. A histórica infraestrutura portuaria, que data de 1922, foi obxecto dunha profunda rehabilitación estrutural por parte de Misturas, nunha actuación financiada conxuntamente pola Autoridade Portuaria e o Concello de Santander.
O Peirao de Maura está constituído por unha estrutura de formigón armado conformada por pórticos con vigas de gran canto, lousa superior, piares e pilotes fincados. Tras alcanzar a súa vida útil, estaba afectado por problemas de corrosión e pechado ao público desde 2018, polo que era urxente a súa reparación
Os traballos desenvolvidos por Misturas tiveron por obxecto rehabilitar a integridade da estrutura, mediante a reparación de recubrimentos, protección de armaduras e colocación de ferralla adicional nos casos nos que desaparecera pola corrosión, aplicando finalmente morteiros de reparación
Trátase dunha obra complexa, ao estar condicionada polas mareas, que fixeron necesario a instalación dunha plataforma para os traballos en seco (aproveitando a carreira de mareas) e a intervención de mergulladores na parte sumerxida.
Con esta actuación reabriuse para desfrute público unha zona de lecer e esparexemento situada na parte emblemática da cidade, próxima ao Centro Botín e con vistas privilexiadas sobre a baía de Santander.
