A Asociación Española de Normalización y Certificación (AENOR) aprobou o pasado mes de xuño a certificación do sistema de xestión de I+D+i de Misturas segundo a nova norma ISO 56.001, o que converteu a empresa na primeira construtora galega en obter este selo.

A nova norma substitúe á antiga UNE 166.002, que desaparecerá definitivamente no 2026.

Misturas iniciou este ano o proceso de migración ao novo referencial, primeiro de ámbito internacional de sistemas de xestión de I+D+i. A súa implantación supón ampliar o concepto de innovación a novos enfoques para xerar valor e mellorar a competitividade nas empresas nas que se teña asentado.

A certificación de Misturas abrangue as actividades de investigación, desenvolvemento e innovación en aproveitamento e reciclaxe de materiais, eliminación de residuos aplicados na produción de mesturas bituminosas, tecnoloxía de inspección e optimización da xestión de infraestruturas lineais e estradas, e desenvolvemento de novos materiais para construción.

A imaxe amosa ao director de Aenor Galicia, José Enrique Rodríguez Coello, facendo entrega do novo certificado a Francisco Javier Prego Martínez, enxeñeiro responsable do departamento de I+D+i de Misturas.