15/10/2013
A localidade de Moaña conta dende 2009 coa piscina municipal de referencia do Morrazo
A empresa Misturas construíu o complexo, que dedicou a ximnasio a planta baixa.
A piscina cuberta e climatizada do Concello de Moaña constitúe un dos equipamentos máis notables construídos por Misturas. O edificio, con 2.202 m2 distribuídos entre planta baixa e alta, conta cun vaso de 12,5 x 25,02 metros, unha área acondicionada para ximnasio duns 275 m2 e todos os servizos necesarios neste tipo de instalacións. A obra foi inaugurada polo presidente da Xunta, Alberto Núñez Feijoo, a finais de outubro de 2009 e converteuse dende aquel momento na piscina municipal de referencia na bisbarra do Morrazo.
Na construción empregouse unha estrutura mixta de formigón armado e aceiro con vigas e piares, agás para o vaso, no que se utilizaron lousa e muros de formigón armado con xunta de dilatación perimetral. Para a cuberta usáronse tres materiais diferentes: na zona do vaso, panel sándwich de chapa de aceiro; no corredor principal, cuberta invertida con illamento e protexida con árido, e na zona de acceso, lámina asfáltica. Para os cerramentos exteriores diferenciouse o corpo central, con paneis prefabricados de formigón, do resto, con fachada de dobre folla alixeirada. Por último, utilizouse carpintaría de aluminio, anodizada para o exterior, e solos de terrazo micrograno, formigón pulido, granito e gres compacto, segundo as zonas, ademais dunha completa e moderna rede de servizos axeitada para unha instalación deste tipo.