16/03/2015
Misturas reforma o Parque de Bombeiros de Teis en Vigo e mellora a súa eficiencia enerxética
Achegarse o máis posible á autosuficiencia enerxética do Parque de Bombeiros de Teis, en Vigo, é un dos principais obxectivos das obras de remodelación do inmoble que está a rematar Misturas. O proxecto incluíu unha instalación para xeración de enerxía solar para auga quente sanitaria e sistemas xeotérmicos que serven como apoio ao sistema de calefacción de gasóleo preexistente. Ambas actuacións implican un importante aforro económico, extremo que resaltou o alcalde de Vigo, Abel Caballero, nunha recente visita de inspección ás obras (na imaxe).
Os traballos, adxudicados polo Concello de Vigo a Misturas, consistiron na reforma xeral da cimentación do edificio e da zona de tránsito dos camións, habilitando unha porta de saída para cada un, de xeito que varios vehículos poidan partir a unha urxencia de forma simultánea sen necesidade de facer manobras. Ademais afrontouse unha mellora da habitabilidade do inmoble, creando novos espazos para o persoal.
A actuación completarase tamén con outros cambios no exterior do edificio, no que o formigón visto será revestido cunha fachada metálica ventilada.