15/03/2022
Misturas protagoniza o especial sobre innovación sostible do programa “Vivir Aquí” de Televisión de Galicia (TVG)
Misturas foi a protagonista da edición especial sobre innovación sostible do programa “Vivir aquí” de Televisión de Galicia (TVG), emitido o pasado 15 de xaneiro na cadea autonómica. O espazo presentado polo xornalista Antón Galocha mostrou algunhas das iniciativas desenvolvidas pola compañía para fabricar pavimentos máis respectuosos co medio ambiente. Ademais de visitar a planta de produción de mesturas bituminosas en frío situada en Allariz (Ourense), a reportaxe centrouse nas mesturas aditivadas con nanocelulosa resultantes do proxecto de I+D+i “EMULCELL”, desenvolto por Misturas coa colaboración de CETIM, Centro Tecnolóxico e do Grupo de Estradas, Xeotecnia e Materiais da Universidade da Coruña (UDC), apoiados polo Centro para o Desenvolvemento Tecnolóxico Industrial (CDTI)-Ministerio de Ciencia e Innovación (Ref. IDI-20171097).
O equipo de TVG desprazado a Allariz foi atendido por técnicos da empresa, que explicaron aos televidentes as características do tramo de firme experimental construído para probar, a escala real, as prestacións dos novos materiais desenvolvidos.
A grava-emulsión aditivada con nanocelulosa presentada nesta reportaxe obtivo en 2021 o primeiro premio do “I Certame de Materiais Innovadores de Galicia”, organizado pola Axencia Galega de Innovación-GAIN, a través da Materioteca de Galicia, e deixa patente a aposta de Misturas por fomentar a sustentabilidade na construción e a incorporación da economía circular na súa actividade diaria.
Pode ver a reportaxe completa na seguinte ligazón:
https://www.crtvg.es/tvg/a-carta/vivir-aqu-semanal-69-5478908