17/11/2022
Misturas constrúe a nova ligazón de acceso á Autovía AG-53 en Dozón (Pontevedra)
A Autovía Dozón-Ourense (AG-53) dispón dunha nova ligazón en Dozón, que conecta a infraestrutura de titularidade autonómica coa estrada estatal N-525 á altura deste municipio pontevedrés.
O novo ramal de acceso conta con dobre sentido de circulación, iníciase no punto quilométrico (P.K.) 275+000 da Estrada Nacional (ampliando o carril de vehículos lentos preexistente) e cruza a AG-53 por un paso inferior situado no P.K. 59+410 da autovía, enlazando finalmente con ela 400 metros máis adiante, pola súa marxe dereita.
O novo acceso á Autovía AG-53 foi construído por Misturas por encargo da Consellería de Infraestruturas e Mobilidade da Xunta de Galicia: entrou en servizo a finais do pasado mes de agosto e mellorará substancialmente a mobilidade da comarca pontevedresa do Deza, evitando os desprazamentos dos veciños á ligazón de Piñor, situado no límite provincial de Ourense.
