20/10/2016
Misturas constrúe o novo centro de saúde de Pontedeva
Misturas foi a empresa encargada da construción do novo centro de saúde do Outeiro, no concello ourensán de Pontedeva, unhas obras que acaban de finalizar.
A obra, promovida pola Consellería de Sanidade da Xunta de Galicia, comprende un novo edificio de dúas plantas, organizado nun único volume compacto do que sobresaen dous soportais que marcan as entradas de ambas as plantas. O inmoble está libre de barreiras arquitectónicas e conta cun ascensor que comunica as dúas alturas.
Na planta baixa situase unha sala de xuntas/biblioteca, vestiarios e zonas de limpeza, almacéns de residuos sanitarios e urbanos con distribuidores de comunicación, e o cuarto de instalacións xerais do edificio.
Na planta superior está a recepción, con acceso directo ao arquivo de expedientes médicos, espazos específicos para xinecoloxía e obstetricia, e unha gran sala de espera que dará acceso ás áreas de consulta médica e de enfermería. Cada sala estará dotada dunha cortina de separación entre a zona de recoñecemento e a de despacho médico.
Cunha superficie construída superior aos 400m2, o edificio dispón ademais dunha escaleira de comunicación entre as dúas plantas e dunha cuberta plana invertida, transitable, sobre unha laxe armada.
