20/09/2018
Misturas asume a conservación de estradas do Sur da provincia de Pontevedra
Misturas é a nova empresa responsable da conservación ordinaria das estradas provinciais do sur de Pontevedra, despois de que a Deputación Provincial lle adxudicara o servizo para os vindeiros catro anos. O contrato asinouse o pasado mes de xuño.
As tarefas que desenvolverá Misturas abarcan, por unha banda, operacións programadas de mantemento de vías e, por outra, a atención de incidencias necesaria para manter as estradas en condicións óptimas de viabilidade e seguridade para os usuarios. Entre as operacións de conservación programadas atópanse a limpeza e acondicionamento de marxes, movementos de terras e control de noiros para evitar posibles aterramentos e desprendementos, reparacións nas drenaxes, pavimentos e obras de fábrica, así como tarefas de sinalización e balizamento de vías.
O contrato abarca un total de 488 quilómetros de estradas convencionais no sur da provincia de Pontevedra. Os municipios nos que se desenvolverá este labor son Vigo, Nigrán, Gondomar, Baiona, Porriño, Salceda de Caselas, Mos, Pazos de Borbén, Redondela, Tui, Tomiño, Oia, O Rosal, A Guarda, Ponteareas, Salvaterra de Miño, Mondariz, Mondariz-Balneario, As Neves, A Cañiza, Covelo, Arbo e Crecente.