10/12/2017
Misturas aposta polo uso combinado de técnicas non destrutivas na inspección de estruturas portuarias
Misturas presentou no III Congreso Internacional de Enxeñería Civil e Territorio, celebrado en Vigo en outubro pasado, unha comunicación sobre os resultados do uso combinado de técnicas de inspección non destrutivas en zonas portuarias.
Concretamente, os responsables da iniciativa destacaron que a utilización combinada de Xeorradar (Ground Penetrating Radar – GPR), Termografía Infravermella (Infrared Thermography - IRT) e Láser Escáner Terrestre ( Terrestrial Laser Scanning - TLS) abre un novo abano de posibilidades para a localización, análise e determinación do alcance das patoloxías que se poden producir nas instalacións portuarias. Neste sentido, incidiron en que en moitas ocasións prodúcense afundimentos parciais ou ocos e cárcavas en zonas de recheo, que poden chegar a alterar a superficie e afectar á súa operatividade, poñendo en perigo a integridade das estruturas portuarias.
Os autores presentaron aos asistentes ao evento, organizado en Vigo polo Colexio de Enxeñeiros de Camiños, Canais e Portos de Galicia e a Ordem dos Engenheiros de Portugal, o caso de estudo dunha chaira portuaria de Galicia, na que analizaron a potencialidade das tres técnicas de inspección non destrutivas (TND) combinadas á hora de coñecer un problema subxacente, analizar as súas causas e buscar unha solución técnica adecuada para a súa reparación.
As conclusións indican que o GPR é unha técnica adecuada para obter información do interior das estruturas; a cámara IRT, para detectar anomalías superficiais e subsuperficiais, imposibles de detectar en inspeccións visuais, e o TLS, para o recoñecemento e medición das patoloxías localizadas na superficie visible do recheo.