07/04/2022
Iniciadas as obras do futuro Centro Tecnolóxico “ Silver Economy” de Zamora, coa visita do presidente da Deputación Provincial
O pasado marzo Misturas iniciou as obras de acondicionamento do Viveiro de Empresas de La Aldehuela, en Zamora, no que se situará o futuro Centro Tecnolóxico de Innovación “Silver Economy”. Trátase dun novo centro de traballo con vocación internacional, destinado a iniciativas empresariais relacionadas cos coidados ás persoas maiores, impulsado pola Deputación Provincial de Zamora.
O futuro centro tecnolóxico ocupará máis de 1.500 m2 e estará formado por varios espazos multifunción, configurando unha proposta innovadora única en España, cuxo principal obxectivo é a investigación e o desenvolvemento de tecnoloxías e servizos especializados no campo dos coidados aos maiores. A Deputación zamorana pretende potenciar o establecemento de empresas de base tecnolóxica, centros de investigación, start-ups universitarias, laboratorios mixtos empresa-universidade e departamentos de I+D+i nas novas instalacións. Para iso, a entidade provincial asinou, recentemente, un acordo coa Universidade de Salamanca para o impulso e difusión da cultura científica e o intercambio de coñecemento entre esta institución académica e as empresas asentadas no parque tecnolóxico
D. Francisco Requejo, presidente da Deputación Provincial, e D. Emilio Fernández, deputado de Desenvolvemento Económico, visitaron as obras o pasado 30 de marzo, acompañados por técnicos de Misturas, que explicaron a planificación e o desenvolvemento dos traballos que están agora mesmo en marcha.
A intervención de Misturas en La Aldehuela completarase coa construción dun novo aparcamento, situado enfronte do Viveiro de Empresas, que contará con varios postos de recarga para vehículos eléctricos.