17/06/2016
Expertos de Misturas analizan as utilidades do xeorradar no congreso Rehabend 2016
Persoal técnico do departamento de I+D+i de Misturas presentou un relatorio sobre as utilidades do xeorradar na análise e inspección de infraestruturas do transporte e estado do subsolo no recente Congreso Euro-Americano Rehabend 2016. O encontro técnico, baixo o lema ‘Patoloxía da Construción, Tecnoloxía da Rehabilitación e Xestión do Patrimonio’, tivo lugar en Burgos e nel participaron relatores de sete países europeos e americanos.
O persoal de Misturas estivo acompañado por investigadores da Universidade de Vigo, cos que precisamente participaran nun exitoso proxecto de investigación sobre a aplicación de tecnoloxías para a xestión e inspección de infraestruturas, financiado polo Centro para o Desenvolvemento Tecnolóxico e Industrial (CDTI).
Coa análise de varios exemplos de uso do xeorradar (Ground Penetrating Radar-GPR, polo seu nome en inglés), os investigadores puideron demostrar que se trata dunha técnica non destrutiva, fiable e efectiva na análise e prospección de capas de firmes e chairas no ámbito de obra civil e da edificación.
Os técnicos de Misturas destacaron o especial interese que esta tecnoloxía ten para o control de calidade en obras de enxeñería civil e para a localización de elementos enterrados, así como para a análise de infraestruturas nas súas primeiras fases de construción ou para a detección de potenciais patoloxías en estradas e zonas de recheo: ocos, gretas, traxectorias preferenciais de cursos de auga…