30/07/2014
Un consorcio liderado por Misturas desenvolve un proxecto para controlar o deterioro dos diques de abrigo
Un consorcio encabezado por Misturas está a desenvolver un sistema experto de xestión que permita a medición e un control tecnolóxico preciso da evolución e o deterioro de diques de abrigo. En concreto, o proxecto céntrase nunha das tipoloxías máis comúns dos diques portuarios exteriores, a de sección en noiro, con núcleo interno e superposición de mantos de pezas soltas, como o existente en Punta Langosteira (Porto Exterior de A Coruña).
Na actualidade, a toma de decisións en relación ao mantemento destas grandes infraestruturas, hoxe moi expostas á acción das ondas pola súa construción en zonas portuarias exteriores para acoller grandes buques, realízase sobre referencias cualitativas e sen información cuantitativa específica. Ademais, a recompilación de datos resulta custosa, incluíndo voos fotogramétricos, restitución manual para obtención de resultados, batimetría multihaz mediante embarcacións, etc.
O desprazamento de pezas do manto é un indicador da debilidade da estrutura e este proxecto, denominado PortoExpert, persegue o control tecnolóxico do estado do dique de xeito que se poida prever con suficiente antelación un hipotético defecto no mesmo. O obxectivo final é a xeración de alertas temperás, tanto para aforrar en medios materiais e humanos nas reparacións, como para minimizar os riscos de acadar un estado de avaría.
O sistema combinará técnicas xeomáticas avanzadas baseadas en modernos métodos de análise, como LiDAR móbil, batimetría multihaz ou redes de sensores sen cables, cámaras para a detección de altura de onda e modelos hidrodinámicos específicos para predicir a influencia da acción dos temporais sobre as estruturas de protección.
O proxecto xa avanzou na integración de sistema LiDAR en embarcacións para inspección, con investigacións realizadas in situ ante o dique de Bouzas (Porto de Vigo), o desenvolvemento de algoritmos para avaliar o movemento dos enormes bloques do manto, a medición do remonte das ondas con cámaras fixas en Punta Langosteira e a simulación SPH do remonte e desborde das ondas en estruturas a escala.
PortoExpert obtivo financiamento da Axencia Galega de Innovación a través da convocatoria Conecta Peme 2013. Do consorcio que o desenvolve, ademais de Misturas, forman parte as universidades de Vigo e A Coruña, e as empresas Proyestegal e HCTech.