04/04/2019
Nanocelulosas para obter mesturas asfálticas en frío melloradas e sostibles
Misturas acaba de iniciar o segundo fito do proxecto de I+D Emulcell, no que traballa desde xullo de 2017 para desenvolver novas emulsións bituminosas mediante o uso de nanocelulosas, co obxectivo de obter mesturas asfálticas en frío melloradas ambientalmente sostibles.
O proxecto Emulcell investiga o uso de distintos tipos de nanocelulosas como emulxentes para a estabilización de mesturas bituminosas en frío, coa finalidade de diminuír o seu custo de fabricación e minimizar os impactos ambientais asociados á fabricación deste tipo de mesturas.
O primeiro fito do proxecto desenvolveuse ata o pasado mes de decembro, coa definición de necesidades, requirimentos técnicos e o deseño e desenvolvemento das fórmulas para as novas mesturas. O segundo fito, iniciado en xaneiro de 2019, busca a optimización das mesmas, analizando os resultados e mellorándoas. Posteriormente realizarase o escalado e a sua aplicación en obra coa construción dun tramo de proba.
Xunto con Misturas, participan neste proxecto o Grupo de Estradas, Xeotecnia e Materiais (CGM) da ETS Enxeñeiros de Camiños, Canais e Portos da Universidade da Coruña e o Centro Tecnolóxico de Investigación Multisectorial (CETIM), a través da súa Área de Materiais Avanzados, contando co apoio da consultora Euro-funding International.
O proxecto Emulcell está cofinanciado polo Centro para el Desarrollo Tecnológico Industrial (CDTI) do Ministerio de Economía y Competitividad (Ref. IDI-20171097), con un orzamento de 568.912 €.
Esta iniciativa de I+D+i presenta un gran potencial no campo da fabricación dos firmes, debido ao elevado número de estradas secundarias susceptibles de ser asfaltadas con este tipo de mesturas e aos beneficios ambientais derivados da redución de consumo enerxético durante a súa fabricación.