15/06/2015
Misturas organiza unha xornada técnica sobre sostibilidade na obra civil con motivo do seu 25º aniversario
Misturas está de aniversario. Con motivo dos seus 25 anos, a construtora organiza a xornada técnica ‘Sostibilidade na construción de obra civil: Novas perpectivas’, un encontro que terá lugar o vindeiro 18 de xuño na localidade de Allariz (Ourense).
Técnicos de diferentes administracións, empresas e universidades participarán nesta xornada, que prevé reunir arredor dun cento de asistentes e que conta coa colaboración do Concello de Allariz e da compañía Extraco.
O programa inclúe demostracións dalgúns proxectos de I+D+i, como o ‘Sitegi’, iniciativa dun consorcio empresarial do que forman parte Extraco e Misturas, ademais da Universidade de Vigo, e que optimiza a aplicación de sistemas integrados de tecnoloxías para a xestión de infraestruturas viarias co obxectivo de mellorar a seguridade e reducir os custos de mantemento. Presentarase tamén o proxecto ‘Biovalvo’ para a valorización das cunchas de mexillón na construción, idea na que participa Extraco xunto con institucións como o CITEEC (Centro de Innovación Tecnolóxica en Edificación e Enxeñería Civil) e a Universidade da Coruña.
Haberá ademais outros dous relatorios sobre técnicas viarias adaptadas ao cambio climático e o uso de mesturas bituminosas en frío fabricadas con RCD’s.
A xornada contempla así mesmo unha visita técnica ás plantas de fabricación de aglomerado, en quente e en frío, que as empresas Extraco e Misturas, respectivamente, posúen no polígono industrial de Chorente, na mesma localidade. Alí os asistentes poderán comprobar in situ algúns dos resultados dos devanditos proxectos ‘Biovalvo’ e ‘Sitegi’.