11/04/2016
Misturas obtén o selo ‘Pyme Innovadora’ do Ministerio de Economía y Competitividad
Misturas SA acaba de obter o selo ‘Pyme Innovadora’ do Ministerio de Economía y Competitividad (Mineco), un recoñecemento do que poderá facer uso oficialmente ata finais de decembro de 2018.
Este título implica interesantes vantaxes fiscais, a inscrición no Registro Pymes Innovadoras do Mineco e o acceso a liñas específicas de financiamento.
A importante implicación de Misturas en diferentes proxectos de I+D+i sustentou a resolución favorable da Dirección General de Innovación y Competitividad, que entre os requisitos para acceder a este selo contempla que as empresas recibisen financiamento público no últimos tres anos a través de diferentes convocatorias de axudas e proxectos de I+D, ou que demostrasen o seu carácter innovador mediante a súa propia actividade.
A distinción a Misturas chega xusto despois de que a compañía conmemorase ao longo de 2015 o seu 25 aniversario. Entre as actividades desenvolvidas para esta celebración destacou a organización dunha xornada técnica na que precisamente se presentaron diferentes iniciativas de I+D e que incluíu unha visita á planta de aglomerado asfáltico que Misturas ten no polígono industrial de Chorente, en Allariz (o vídeo amosa un resumo desta xornada).