24/11/2015
Misturas compra en Allariz a parcela na que está instalada a súa planta de aglomerado asfáltico en frío
Misturas acaba de adquirir unha parcela no Polígono Industrial de Chorente, en Allariz (Ourense), na que ten instalada unha planta de aglomerado asfáltico en frío. Trátase dun terreo de 12.000 m2 de superficie do que ata o de agora dispoñía en réxime de aluguer.
A planta instalada en Allariz é de tipo móbil, da marca Fabremasa, modelo MZF-3, consta de dúas moegas e ten unha capacidade produtiva de 180 T/h para mesturas bituminosas en frío, e de 250 T/h para grava-cemento.
O pasado mes de xuño, con motivo da celebración do 25 aniversario de Misturas, técnicos de varias administracións e representantes de empresas do sector puideron coñecer estas instalacións e o proceso de fabricación de aglomerado asfáltico en frío.
Este produto está elaborado con mesturas de áridos seleccionados e emulsións asfálticas, fabricado para a súa aplicación e endurecemento en frío. É similar ao quente, pero resulta máis eficaz nunha gran variedade de usos baixo calquera condición meteorolóxica.