07/09/2020
Misturas completa a reforma e acondicionamento do Pavillón XII da Casa de Campo de Madrid
Misturas terminou o pasado mes de agosto as obras de reforma e acondicionamento do Pavillón XII do Recinto Feiral da Casa de Campo de Madrid. Trátase dun edificio singular, de 2 plantas, construído en 1965 como pavillón de exposicións do Instituto Nacional de Industria, destinado a exhibicións de maquinaria pesada, que foi deseñado orixinalmente polo arquitecto Francisco Belosillo. Na actualidade está xestionado pola empresa pública “Madrid Destino Cultura, Turismo y Negocio, S.A.”, propiedade do Concello da capital.
As obras realizadas tiveron como obxectivo recuperar a estrutura e os espazos orixinais do histórico pavillón, como fase previa á implantación de novos usos. Para tal fin foron acondicionadas as cubertas eliminando fibrocemento e recuperando a impermeabilización da lousa orixinal. Tamén foron eliminadas as pérgolas e locais engadidos ao edificio principal, cadros e instalacións obsoletas que enmascaraban a estrutura orixinal do edificio. Recuperouse ademais unha zona de terrazas e soportais, liberando a planta baixa dos cerramentos que ocultaban a diafanidade dos espazos orixinais, que quedaron listos para novas actividades. Está previsto que, no futuro, o edificio acolla a sede da Banda Sinfónica Municipal de Madrid.
