30/03/2026
Dous anos máis de coidados para os xardíns dos tres campus da Universidade de Vigo
Misturas gañou por dous anos máis o novo contrato de conservación e mantemento de xardíns e zonas verdes da Universidade de Vigo (UVigo).
Os traballos abranguen os tres campus de Vigo, Ourense e Pontevedra, incluíndo o chamado Campus Histórico de Vigo, na rúa Torrecedeira, e o arboredo da facultade de Belas Artes de Pontevedra.
Son, en total, arredor dun centenar de hectáreas (95,3 en Vigo e Pontevedra, e outras 6 hectáreas no concello de Ourense). Ademais, inclúense zonas duras afastadas das edificacións, estacionamentos multicentros, rúas e viais, así como as infraestruturas de rego e drenaxe. O contrato distingue en xeral entre zonas axardinadas, campos e instalacións deportivas exteriores, espazos naturalizados e áreas forestais.
Misturas presta este servizo para a Universidade de Vigo desde outubro do ano 2023.
