Entra en servizo o novo albergue de peregrinos de A Laxe en Vilasantar (A Coruña)

O novo albergue de Vilasantar (A Coruña), construído por Misturas para a Consellería de Cultura e Turismo da Xunta de Galicia, entrou en servizo esta semana Santa acollendo peregrinos que percorren o Camiño do Norte cara a Santiago, con motivo da ampliación do Ano Santo Compostelán a 2022 e coincidindo co inicio da tempada alta do Xacobeo.

O albergue sitúase na antiga casa reitoral de A Laxe, totalmente rehabilitada para poñela en valor e dar novos usos a edificios emblemáticos do patrimonio cultural de Galicia.

O renovado edificio ten 326 m2 de superficie útil, divididos en dúas plantas que albergan dormitorios xerais, un dormitorio adaptado para persoas con mobilidade reducida, cociña, comedor, zona de estar e baños xerais e adaptados. Conta tamén cunha edificación auxiliar na que se sitúan outros servizos para os peregrinos: lavadoiro, tendedeiro e cuarto para bicicletas.

As novas instalacións suman 30 novas prazas á rede pública de albergues do Camiño de Santiago e foron visitadas por D. Alfonso Rueda, Vicepresidente da Xunta de Galicia, o pasado 21 de marzo, quen comprobou a finalización dos traballos acometidos por Misturas, como paso previo á súa apertura ao público.

Pode coñecer mais detalles do Albergue de peregrinos de Vilasantar neste vídeo: ALBERGUE VILASANTAR 2022